MOLIMAU: PU’A FE’AUSIGA AFEMATA MOLI CHANG

(Tui Atua Tupua Tamasese Ta’isi Efi, Bahai Manurewa, Aukilani, NZ, 17 Iuni 2017)

I la’u matau i le soifuaga o Pu’a, e faasinoala i lona mafaufau ma mea na te fai le fesili e faa’upuina faapenei, Pe faapefea ona faaaogā lo’u mafaufau ma lo’u malosi e fai ai so’u sao i lo’u aiga, i lo’u nuu, i lo’u malo, i la’u ekalesia.

I lona aiga, o se tagata fai fanau. E ‘aputi, ‘apo’apo, e alofa, e onosa’i, e faamagalo. E iloa mai i lana tausiga ma lana faasinoala ia le fe’au tāua o le upu ‘faafailele’, e pei o le alofa o le tinā i lana tama faato’ā fanau mai.

Ae ua lagolagosua i lana faafailele ia le faautautaga a Afemata. To’aga i a’oga; to’aga e faigaluega, ina ia ‘alofia le uafālōlō ma le faamoemoe i isi tagata.

O le molimau o le la galuega faalematua o le faamanuiaga o fanau i a’oga faapea ai ma a latou galuega ua tula’i mai ai. E leai se isi e uafālōlō ma o le ala fo’i lea e ganea ai ana upu ma ana mea e fai, ona e tua ia la atina’e ma Afemata ae faapea ai ma le malosi tau tupe ua faamanuiaina i a latou pisinisi ma ā latou galuega.

E fai mea lelei i le aiga auā e tua ana upu i lona malosi – o a la faato’aga ma Afemata, galuega, pisinisi a Afemata faapea ai ma galuega a le fanau.

E māfua ona lagona le leo o Pu’a i le Ekalesia faapea ai ma le nuu, ona e tagolima. Ma e lagolago i ai le tofa e lotomau ma faamaoni.

I galuega tetele uma a le aiga sa faia i Lufilufi, Vaimoso ma Nofoalii, o se tasi lea o le toomaga o le aiga, o Pu’a ma le fanau.

O le isi meaalofa a le Atua iā Pu’a, o le agaga e toafilemu. E lē gaeevale pe soona losilosivale. E fuafua lelei le mea e tatau ona fai, auā e lotomau ma loto malosi, ona e iloa e i ai le malosi e lagolago lana faautaga e fai se galuega.

Ua avea lava ia ma faailoilo o le ‘anava a lenei aiga. Aua o le uiga o le igoa o le aiga lenei, o le tama gasesese mea lelei, aua e iloa oe i le afu o lou muaulu ma lau galuega fai, ae lē ona o le gafa ma le tala faasolopito.

Ma ua ‘avea fo’i ia ma faailoilo o upu o le Pese:

‘Ave lo’u ola ia aogā
Le Alii e i au fe’au;
‘Ave ou aso o totoe
E viia ai o lau afio

Ia manuia lau faigamalaga. Ia manuia lau fanau ma ia avea lou lototele ma lou lotomau ma lou faamaoni e fai ma faasinoala i lenei aiga.

Soifua